Vivimos nun concello fermoso e cheo de historia. As nosas Terras de Aguiar, tal como foron bautizadas hai máis de sete séculos, combinan as paisaxes de ribeira coas de montaña. Senda as augas do Miño, Loña ou das decenas de regos e regatos espallados polo naso municipio, as arterias que comunican entre si os nosos pobos. E con eles comunicámonos cada un de nós: o corazón humano do Pereiro.
Propoñémosche descubrir unha desas arterias e gozar do noso patrimonio natural, dos nosos montes e pozas. Apreciar a diversidade da nosa fauna, respectando un hábitat que compartimos con ela. Valorar a pegada material daqueles que ocuparon estas terras antes da nosa chegada. Fascinándonos con obras de enxeñería hidráulica como muíños, pontes e pontellas; e tamén con Igrexas, pazos ou torres de tempos pasados.
Dende o teu Concello poñemos a túa disposición unha rede de sendeiros perfectamente balizados cos que queremos convidarte a redescubrir o teu territorio. Unha infraestrutura apta para todas as idades. Para pasear, practicar sendeirismo, camiñar coas nosas mascotas, practicar deporte, etc.
